Siglir tar il cuntegn

Header

cuntegn

Engiadina Puntraschigna desista da taxa per Repower

Perquai che Repower n'ha betg anc cumenzä cun la fabrica da l'ovra d'accumulaziun Lago Bianco stuess il concern d'energia ussa pajar ina taxa a la vischnanca da Puntraschigna

Enfin ils 9 avrigl 2017 avess il concern d'energia Repower stuì cumenzar cun las lavurs da construcziun per l'ovra d'accumulaziun Lago Bianco. Quai è vegnì fixà l'onn 2011 en la concessiun per l'utilisaziun dal Lago Bianco. En questa concessiun èsi era fixà che Puntraschigna po incassar ina taxa sche las lavurs na cumenzan betg infra il termin fixà.

La vischnanca desista da la taxa

La suprastanza communala da Puntraschigna ha dentant decidì da desister da questa taxa en l'autezza da radund 50'000 francs l'onn. Quai communitgescha la chanzlia communala. Cun la situaziun actuala sin il martgà d'energia saja quai cler che Repower na possia betg realisar il project Lago Bianco.

Novs termins

Sin dumonda da Repower ha la suprastanza communala en pli fixà novs termins per il project da fabrica. Repower sto cumenzar cun las lavurs durant ils proxims 10 onns. L'ovra d'accumulaziun Lago Bianco stuess lura esser finida enfin circa l'onn 2035.

Artitgels legids il pli savens