Suenter dus onns pausa pervia da corona, ha la giuventetgna da Puntraschigna puspè prendì per mauns l’organisaziun dal festival da musica «Terratrembel». Quest onn ha lieu la 21avla ediziun. L’organisaziun pudess pia esser ina rutina. Quai n’è però betg il cas. Il comité d’organisaziun sa cumpona numnadamain da commembers da la «Giupo», la societad da giuventetgna da Puntraschigna. Quella daventia adina pli giuvna ed ils pli vegls bandunan la societad, di Nino Leder dal comité d’organisaziun da quest onn. Uschia saja l’organisaziun adina puspè ina gronda sfida.
Organisaziun a lunga vista
L'organisaziun per l'eveniment haja cumenzà gia la primavaira. Pli cunter che l'eveniment vegnia, dapì glieud duvria per metter en chomma il festival. La sala dal center da congress Rondo a Puntraschigna vegn transfurmada durant dus dis en ina sala da festa.
Public pli spontan
Er il public saja sa midà ils ultims onns. Quai sa resentia oravant tut tar la prevendita da bigliets. Quella saja plitost mediocra. Tenor Nino Leder daventia la glieud adina pli spontana e na planisescha las occurrenzas betg pli ordavant. Per ch’il «Terratrembel» 2022 rendia, vuli var 400 visitaders e visitadras. Impurtant per attrair quels, saja ina spierta da musica variada. Perquai haja la giuventetgna organisà quest onn differentas bands indigenas.