Siglir tar il cuntegn

Header

Navigaziun

Maurice Sausse, Tamara e Dario Cadonau
Legenda: Maurice Sausse da Trust You ha surdà a Tamara e Dario Cadonau il diplom per la meglra valitaziun d'in hotel en Svizra. mad
cuntegn

Engiadina Puncts, stailas e poleschs – il mintgadi dals hotels

La valitaziun dals hotels sin differentas plattafurmas sco Tripadvisor, Booking.com u Holidaycheck è daventà adina pli impurtanta per ils hoteliers. A maun da quella decida ozendi la gronda part dals giasts.

Ils ospitants èn perquai bunamain obligads da tgirar tut quellas paginas nua che lur hotels vegnan valitads. Per survegnir ina survista cumpletta da tut las plattafurmas da valitaziun, resumescha l’interpresa Trust You, la pli gronda plattafurma da feedback dal mund, tut ils resultats per mintga object, uschia che l’hotelier ha adina la survista.

Giast duai bandunar hotel cun bun sentiment

Per che las valitaziuns da l’hotel sin las differentas plattafurmas resultan (sche pussaivel) positivas, emprovan ils ospitants dad ademplir tut ils giavischs dal giast.

Impurtant è ch’il giast dat ses puncts e commentaris anc durant ch’el è en chasa.
Autur: Dario CadonauHotel Cadonau In Lain, Brail

La lavur ch’ins ha d’investir en la gestiun e surveglianza da las paginas, daventia adina pli intensiva. Ignorar las valitaziuns ch’èn en la rait, na possia ins dentant mai, di Dario Cadonau. Ses hotel ha cuntanschì la nota maximala da 99 puncts ed ha er survegnì tenor quella las meglras valitaziuns per in hotel en Svizra.

Reagir e tgirar ils giasts

En cas d’ina critica u ina valitaziun negativa da l’alloschi, stoppian ins reagir uschè svelt sco pussaivel e contactar il giast persunalmain, ha declerà Andrea Cologna, vice-directura da l’Hotel Laudinella a San Murezzan.

Segl ha fatg sia lavur

Che gist quatter hotels a Segl èn rangads sut ils emprims alloschis da la glista da valitaziun che Trust You ha publitgà, è tenor Patrick Dientrich da l’Hotel Waldhaus a Segl ina casualitad. Dentant suttastritga quest fatg er ch’ils hoteliers fetschian ina buna lavur areguard la tgira dals giasts en chasa e garanteschian uschia er la visita da novs.

RR actualitad 12:00