Siglir tar il cuntegn
Inhalt

Engiadina Proxim pass envers digitalisaziun

Cun la realisaziun dal cabel d’electricitad sutteran en l'Engiadina, vegn era il project da Mia Engiadina adina pli concret.

In cabel da fibra da vaider en detail
Legenda: Quest cabel ch’empermetta transfer da datas fin 50 giadas pli svelt, duess colliar l’Engiadina cun il rest dal mund. Keystone

Sper ina rait da fibra da vaider da la Swisscom gia existenta en l'Engiadina, vulan ils iniziants da Mia Engiadina numnadamain era realisar in’atgna colliaziun cun ina rait da fibra da vaider da La Punt Chamues-ch a Scuol. L’idea è dad installar questa rait da fibra da vaider en il medem stgav sco il cabel d’electricitad, che vegn ussa mess sut terra.

Emprims pass per colliar l’Engiadina cun la regiun da cunfin dals trais pajais

Plinavant vegn era evaluada ina colliaziun da fibra da vaider cun il Tirol dal Sid e dal Nord. Suenter in’emprima sesida cun la politica regiunala è vegnì decidì, da laschar elavurar in studi co ins po instradar il meglier ina tala colliaziun sur cunfin.

Emprims resultats duessan gia vegnir preschentads en 3 fin 4 mais. Tenor Not Carl, in dals iniziants da Mia Engiadina, saja l’interess per ina collavuraziun sur cunfin tar ils vischins numnadamain gronda.