Proposta pli moderada per imposta da 2. abitaziuns a Silvaplauna

La nova proposta per ina lescha d'imposta da 2. abitaziuns è pli moderada che las propostas oriundas.

Laschar ir video «Proposta moderada per la taxa da 2. abitaziuns a Silvaplauna»

Proposta moderada per la taxa da 2. abitaziuns a Silvaplauna

2:14 min, Actualitad video dals 7.1.2016

Tgi che ha ina 2. abitaziun a Silvaplauna duai pajar ina imposta en avegnir. Ussa propona la suprastanza communala ina nova lescha per definir questa imposta. Nov duai valair era l'agen diever da l'abitaziun per reducir l'imposta. Uschia duai pajar be 50% da l'imposta tgi che occupescha l'abitaziun dapli che 45 dis. Sche insatgi occupescha sia abitaziun dapli che 90 dis na sto el betg pli pajar l'imposta. La proposta per ina nova lescha è en exposiziun da cooperaziun publica a Silvaplauna dapi ils 7 da schaner.

Lungas charplinas

La nova proposta da la suprastanza communala per ina lescha è la reacziun sin la dumonda da sistir insumma l'imposta. Iniziants indigens avevan fatg questa dumonda cura che la vischnanca vulaiva introducir la varianta oriunda da la lescha per ils 1.1.2015. Sin quai aveva decidì la radunanza communala da Silvaplauna la fin da l'onn 2014 da sistir l'introducziun. La proposta actuala da la suprastanza communala è la cunterproposta da la suprastanza a la dumonda da sistir dil tuttafatg l'imposta. Avant aveva decidì il tribunal federal che l'imposta saja legala.

La suprastanza communala argumentescha che l'aboliziun da l'imposta fiss la faussa via. Las adattaziuns da la lescha en il senn da las pretaisas dals proprietaris da segundas abitaziuns saja in agir pli adequat, uschia la suprastanza communala en ses commentari davart la proposta per la nova lescha. L'imposta en questa furma saja adequata, era pervia dal fatg che la taxa da turissem per abitaziuns a Silvaplauna saja pli bassa che en autras vischnancas.

RR Actualitad saira 17:00