Project Indoor Engiadina

Pir uss è Paolo La Fata vegnì activ era public - sin facebook ha el lantschà ina retschertga per chattar or sch'i è insumma avant maun in interess per in project d'ina halla indoor. Enfin uss han 250 persunas respundì a las dumondas e fatg propostas per ideas, tge che uschè ina halla duess offrir.

In model da l'intern d'ina halla.

Legenda da maletgs: Quai pudess esser la versiun d'ina pitschna halla. mad

Sper la retschertga sin facebook è Paolo La Fata sez fitg activ cun tschertgar il discurs cun politichers e persunas che pudessan avair in'influenza sin ils politichers, quinta Paolo. Finamira è da chattar uschè spert sco pussaivel in lieu adattà. Gist quai vegn dentant ad esser il pass il pli difficil, è era el persvas. Ins sappia che las plazzas en Engiadin'Ota sajan stgarsas u na vegnian betg dadas libras.

«  Jau na vul betg laschar valair l'argument ch'i na dat betg plazza en Engiadin'Ota per uschè in project. »

Paolo La Fata
Iniziant da "Projekt Indoor Engadin"

En las proximas duas emnas spetga Paolo La Fata resposta da las vischnancas, schebain ellas avessan in lieu nua ch'il project pudess vegnir realisà. Era gia pront fissan skizzas co uschè ina halla pudess vesair ora.

Tge che dovra è plazza

  • 600 meters quadrat per ina pitschna halla per radund 250'000 francs
  • 1'500 meters quadrat per ina gronda halla per radund 4 milliuns francs

Per Paolo La Fata èsi cler, el vul realisar insatge grond per blers interess e per in public different.

RR actualitad bunura 06:00