Uss fa il chantun in’excepziun. La societad da pestga Lej da Segl duai empruvar or en il project da pilot accumpagnà sche quai funcziuna. Quai cun il consentiment da las ulteriuras societads da pestga dal Grischun ha ditg Marcel Michel da l’uffizi chantunal per chatscha e pestga. Questas han numnadamain ditg che l'idea è betg che quai saja persuenter pussaivel en tut il chantun Grischun. I duess esser ina chaussa locala cun la pussaivladad da era pudair pestgar a Segl sin il lai schelà. E betg che quai daventass in club exclusiv.
Pestgar d'enviern vegn vinavant betg ad esser pussaivel sin autras auas publicas
La tenuta da l’uffizi per chatscha e pestga dal chantun Grischun resta numnadamain la medema: i vegn betg ad esser pussaivel da pestgar sin il glatsch sin tut ils lais ha ditg Marcel Michel. Uschè statti era en la lescha.
Project da pilot per decider definitivamain
Il chantun vul dentant far in pass envers la societad da pestgaders Lej da Segl e lubir ed accumpagnar in project da pilot sur 2 onns. Mo uschè sappia ins la fin decider definitivamain sche quai vegn ad esser pussaivel en avegnir sin il lai da Segl ni betg. En emprima lingia vai per chattar or sche pestgar d'enviern è era da vart da la protecziun dals animals pussaivel.