Siglir tar il cuntegn

Header

cuntegn

Engiadina Pro Senectute tschertga «Nons e Nonas» per trametter a scola

«Generaziuns en stanzas da scola» sa numna il project da la Pro Senectute che duess uss er reussir en la scola da San Murezzan. L’interess tar l’emprima preschentaziun è stà grond.

Dapi ils onns 2000 s’ha il project «GiK» verifitgà en numerus chantuns da la Svizra. En Grischun datti fin uss a Cuira, Panaduz/Razén, Tavau, Domat e Landquart persunas che s’engaschan tenor il model da la Pro Senectute.

Barat da generaziuns

Central tar l’idea è ch’ils seniors accumpognan ina classa regularmain 2-4 uras per emna ed han plaschair vid il contact e la lavur cun uffants ed han pazienza e temp per communitgar e gidar ils scolars.

Agid e sustegn per magisters

6 magistras da San Murezzan èn s'annunziadas per sa participar cun lur classas al project. Sper il fatg ch’ils «Nons» e «Nonas» èn automaticamain er in agid per il magister en stanza da scola, duai il project surtut procurar in barat e la chapientscha da las generaziuns ina tranter l’autra.

Nus na tschertgain betg simplamain in bratsch gratuit che gida en scola, mabain ina situaziun da «win-win» per tut las generaziuns.
Autur: Othmar Lässer manader Pro Senectute Grischun dal sid
audio
Saira: Barat e chapientscha per pliras generaziuns
ord Actualitad dals 17.03.2017.
laschar ir. Durada: 3 minutas 14 Secundas.

Avant ch’ina classa survegn in «Non» u ina «Nona» datti oravant discurs ed in di da fufragnar per ils seniors. Singulas persunas ch’eran preschentas a l’infurmaziun da la Pro Senectute han gia fixà in emprim inscunter, auters dals bun 15 seniors interessads èn s'inscrits per vegnir infurmà pli detagliadamain.

Non e Nona en curt en scola

Sche tut funcziuna tenor plan, uschè Othmar Lässer, duain bainbaud ils potenzials «Nons» e «Nonas» accumpagnar scolars da San Murezzan regularmain en las classas ed uschia garantir in barat tranter las generaziuns.

Artitgels legids il pli savens