Siglir tar il cuntegn

Header

audio
Selma Mahlknecht vegn undrada cun il Premi travers
Or da Actualitad dals 19.11.2022.
laschar ir. Durada: 3 minutas 3 Secundas.
cuntegn

«premi travers zuoz» Selma Mahlknecht vegn undrada

Lucian Schucan, Selma Mahlknecht, Gianna Olinda Cadonau e Rico Valär.
Legenda: Da sanester: Lucian Schucan (vischnanca da Zuoz), Selma Mahlknecht (autura), Gianna Olinda Cadonau (organisatura) e Rico Valär (giuria). FMR

L’autura e reschissura Selma Mahlknecht survegn l’emprim «premi travers zuoz». Quest onn surdattan la Lia Rumantscha e la vischnanca da Zuoz per l’emprima giada quest premi.

L’autura e reschissura che viva a Zernez vegn onurada per ses toc da teater «Üna sbrinzla da spranza per S-chus-ch». Tenor l'autura, oriunda dal Vnuost, saja quest premi ina gronda lezia. Numnadamain è quest premi collià cun l'incumbensa da realisar il toc da teater fin l'onn proxim.

Ulrica Guidon e Selma Mahlknecht
Legenda: Ulrica Guidon e Selma Mahlknecht collavuran vi dal toc undrà cun l’emprim «Premi Travers Zuoz». FMR

Emprim toc da teater rumantsch

Selma Mahlknecht ha scrit gia divers tocs da teater. Quest toc è però l'emprim da lingua rumantscha. Ella saja vid emprender rumantsch e da scriver in toc per rumantsch saja ina sfida che motiveschia. Agid per la traducziun survegn l'autura e reschissura da la Zernezra Claudia Guidon. Ellas hajan collavurà gia per la realisaziun d'in cudesch da Selma Mahlknecht e da pudair continuar fetschia grond plaschair.

Il toc da teater vegn realisà l'onn proxim durant l'emprima ediziun dal «festival travers zuoz». Il «premi travers zuoz» è dotà cun 15’000 francs e vegn surdà ils 19 da november.

En tut ha la giuria survegnì 10 concepts ed extracts da text per cumedias autalpinas, thrillers, paraulas e melodramas famigliars en sursilvan, vallader, puter e rumantsch grischun. Part a la giuria han fatg Anna Serarda Campell (scienzada da teater), Sara Francesca Hermann (actura), Manfred Ferrari (reschissur e producent), Rico Valär (romanist) e Roman Weishaupt (directur dal Teater Cuira).

RTR novitads 12:00

Artitgels legids il pli savens

Scrollar a sanestra Scrollar a dretga