Werner Steidle vegn undrà cun il premi cultural 2016. Quai per ses engaschi sco dirigent, musicist, organist e surtut per ses merits sco magister da musica e promotur da la furmaziun musicala en Engiadin'Ota.
Werner Steidle ha 61 onns, è creschì si a Constanza e viva dapi la scola secundara a San Murezzan. Là ha el fatg in giarsunadi sco electrodissegnader. Suenter ha el studegià al conservatori Winterthur orgla, clavazin e clarinetta. Dapi il 1987 s'engascha el sco magister da musica e maina divers chors. Cun sia lavur enritgescha el la vita culturala en Engiadin'Ota, scriva la cumissiun da cultura.
Aita Bott da Zuoz vegn undrada per ses merits en la sparta design. La giuvna da 32 onns ha fatg in num cun diversas atgnas exposiziuns, ed en collavuraziun cun designers renumnads sco Barber&Osgerby. En sia lavur sa confrunteschia ella cun ils tipics materials e l'ierta culturala dal mastergn en Engiadina, sco la cumissiun da cultura annunzia.
La premiaziun publica ha lieu ils 18 november 2016 en l'hotel Laudinella a San Murezzan.