Siglir tar il cuntegn
Inhalt

Engiadina Pista a val enfin en il vitg ha prioritad a San Murezzan

Quai ha ditg il president communal Sigi Asprion a chaschun dal «Dorfgespräch» da San Murezzan. Quel ha gì lieu sut il titel, schebain il sport da skis saja anc il futur per la regiun u betg. Ins stoppia restar sin il current per avair schanzas sin il martgà, ed ina pista fin il vitg tutgia vitiers.

Qua fiss la pista a val fin en il vitg a fin.
Legenda: Qua fiss la pista a val fin en il vitg a fin. RTR, V. Rominger

In project è gia sin maisa. Tenor quel manass la nova pista atras guaud che stuess vegnir runcà. Quant n’è anc betg cler, gist uschè sco ils custs per il project. Detagls vegnian il mument sclerids. Cura che quests sajan enconuschents, vegnian els era communitgads.

Via giuridica pudess daventar difficila

Quitads fa actualmain la via giuridica. I saja difficil da persvader tuts, uschia Asprion. Gist uss sajan ins en tractativas cun in possessur da terren privat. Cura ch’il project po vegnir realisà, è dentant anc intschert.

Sper la pista en il vitg duai gist era vegnir meglierada la situaziun per cuntanscher la staziun da la funiculara. Enfin ussa ston ils skiunzs chaminar d’ina rampa stippa si. Durant l’enviern sa preschenta qua ina situaziun da privel. En il rom da la pista en il vitg duai vegnir realisà ina metoda pli cumadaivla per il skiunzs.