Siglir tar il cuntegn

Header

cuntegn

Engiadina Petiziun per Lagalb na porta betg il salvament

Cun ina charta da petiziun online a las pendicularas d’Engiadin’Ota ed a la vischnanca da Puntraschigna, vul l’iniziant Florian Wurfbaum salvar la gestiun da la Lagalb.

La gestiun da la pendiculara sin il Pass dal Bernina duai finir ils 17 d’avrigl 2016 per dal bun. La possessura da la Lagalb, la Engiadina San Murezzan Mountains SA n’è betg pli pronta da purtar vinavant l’implant deficitar.

Resistenza encunter questa decisiun hai schon dat plira. Era sa ha furmada ina gruppa d'interess ed in investider potenzial era enconuschent cun Gian Luzzi Battaglia.

Quest ha dentant sa retratg cumenzament dal mais mars. Entant è sa furmada en la rait ina nova gruppaziun sut il num «Lagalbfreunde». Florian Wurfbaum, da Minca è l'iniziant che ha lantschà ina petiziun online sin Facebook. Schon passa 1200 suttascripziuns en vegnidas ensemen.

audio
Bunura: Florian Wurfbaum vul salvar la pendiculara Lagalb
ord RTR Audio dals 24.03.2016.
laschar ir. Durada: 2 minutas 52 Secundas.

Quai sulet gida pudess dentant gidar pauc a la pendiculara. I vul en emprima lingia insatgi che investescha en la pendiculara. La finamira da Florian Wurfbaum egl da dasdar la populaziun che para d'avair acceptà la situaziun. Quai ch'el sco amatur da la Lagalb, vul betg.

Manca soluziun economica

Sco ch’il president da las pendicularas Engiadina San Murezzan Mountains SA, Luis Wieser, ha ditg ad RTR, haja el plaschair da las numerusas suttascripziuns da la petiziun. Dentant vulessi surtut ina soluziun a reguard la finanziaziun da l’implant e betg simplamain in consentiment da simpatia per la Lagalb.

Anc adina pront da porscher maun

Sco gia a l’investider interessà Gian Luzi Battaglia, saja la societad anc adina pronta da gidar da manar la pendiculara sche insatgi è bun da purtar ils custs da la Lagalb. Actualmain registresch ins 150 skiunzs per di ed a la fin da la stagiun datti en media 170'000 entradas, quai che correspunda ad in quart da las entradas che vegnan fatgas sin la Diavolezza.

audio
Bunura: Reacziun da las pendicularas sin la petiziun
ord RTR Audio dals 24.03.2016.
laschar ir. Durada: 3 minutas 41 Secundas.

Nagina tema per Diavolezza

Era sche la purschida da la Lagalb n’avess betg pli d’exister, na hajan ins betg da temair che la pendiculara da la Diavolezza fiss il proxim implant che vegn serrà. La societad n’haja nagin interess da laschar crudar insatge ch’ins ha tgirà ed investì ils ultims onns passa 8 milliuns ha intunà Luis Wieser.

Nov investider potenzial ?

Sch’i na dat betg ina soluziun a curta vista, è ils 17 d’avrigl l’ultim di da la Lagalb e cun quai giess a finir la historia d’in implant che ha scrit be ina giada cifras nairas durant ils ultims 50 onns.

Pussaivel è dentant ch’in investider potenzial s’annunzia anc. In’occasiun ideala fiss la radunanza generala da las pendicularas Engiadina San Murezzan Mountains SA als 4 d’avrigl 2016.

Artitgels legids il pli savens