Siglir tar il cuntegn
Inhalt

Engiadina Perda Sta. Maria sia posta?

La Posta svizra examinescha la filiala a Sta. Maria en Val Müstair. Quai pervia che adina damain glieud fa diever da l'offerta al spurtegl.

Posta a Sta. Maria
Legenda: Quant ditg che la filiala da la Posta svizra a Sta. Maria resta anc averta è intschert. RTR/David Spinnler

Markus Werner da la Posta svizra ha ditg envers l'agentura da novitads ANR che il cuntegnair da la glieud sa mida adina vinavant: Adina damain persunas tramettan anc brevs u fan pajaments al spurtegl. In tut la Svizra haja quai dà ina reducziun da 65% tar il transport da brevs e tar ils pajaments al spurtegl saja il minus tar 40%. Era tar la filiala a Sta. Maria en Val Müstair ha la Posta constatà che las visitas al spurtegl van enavos. Perquai examinescha la Posta svizra ussa tenor Werner sche ins possia anc laschar avert la filiala.

Il servetsch duai restar

Sper Sta. Maria ha la Posta svizra anc ina filiala cun spurtegl a Müstair. A Sta. Maria duai dentant era dar in servetsch da la posta sche la filiala vegniss serrada. La posta ha introducì divers models gia en auters lieus. Quai po esser ina filiala cun partenari, per exempel ina butia. In'autra varianta è il servetsch a chasa. Ils clients da la posta pon lura far per exempel pajaments cura che il postin porta la posta. La Posta svizra n'ha dentant tenor Werner anc betg decidì co ch'i va vinavant cun la filiala a Sta. Maria. Ins saja en contact cun las autoritads communalas per evaluar la situaziun e crear scenaris per l'avegnir.

RR novitads 14:00