Siglir tar il cuntegn
Inhalt

Engiadina Pendicularas e runals Zuoz SA - Too big to fail

Il rendaquint da la societad per la stagiun d’enviern 2016/17 serra puspè cun in resultat negativ. Quai malgrà che la regiun da skis sur Zuoz ha pudì generar cun ils Campiunadis mundials da skis il favrer dapli entradas.

Regiun da skis Zuoz.
Legenda: En la regiun da skis da Zuoz han gì lieu quest onn las cursas da preselecziun dils Campiunadis mundials da skis. RTR, Anna Caprez

Sco ch’il president da la Pendicularas e runals Zuoz SA (SSZ), Luis Wieser, ha declerà als acziunaris, saja la stagiun d’enviern passada stada la terza en fila senza naiv. In fatg che haja augmentà marcant ils custs per producir naiv cun chanuns.

Senza ils mezs dal maun public, na fissi betg pussibel da far ir a Zuoz implants da skis.
Autur: Luis Wieserpresident admin. Pendicularas Zuoz SA

Cifras cotschnas

Il rendaquint 2016/17 serra suenter las amortisaziuns cun ina perdita da 350’000 francs. In dals pli gronds problems da la societad è, ch’ils mezs liquids èn adina pli stgars. Il cussegl administrativ haja perquai er gia passà pled cun la vischnanca da Zuoz che posseda la maioritad d’aczias.

Las pli grondas perditas scriva la societad tras amortisaziuns, uschè Luis Wieser. Tenor el han las Pendicularas e runals Zuoz SA da transmidar ina part da l’emprest che la vischnanca da Zuoz aveva dà en chapital d’aczias. Finamira saja numnadamain da sanar ils proxims onns la bilantscha.

Senza implants na vai betg

Per la vischnanca da Zuoz che ha investì adina puspè en la regiun da skis, na dettia gronda schelta, manegia il president communal Flurin Wieser. El è il medem mument er il manader da gestiun dals implants a Zuoz. Cunquai che la regiun da skis furma ina purschida existenziala per il sectur da turissem, na dettia bunamain ina schanza da betg gidar a la societad, sch’ella dovra raps per investiziuns.

RR actualitad 17:00