Sco ils experts han communitgà han ins chattà ina contaminaziun da 100 grams PCB en il Spöl e quai sin ina lunghezza da radund tschintg kilometers. La situaziun saja uschia pli dramatica, empè da 0.02 grams sin in kilo sediment sa tracti da 0.5 grams per kilo, scrivan ils responsabels.
Sco emprim vulan ils responsabels nettegiar sulettamain il batschigl, quel pitschen lai gist sut il mir da fermada da Punt dal Gall. Cun questa mesira duai vegnir allontanada la gronda part dal PCB che sa chatta en l'aua ed en il fundament.
Il mument n'è il Parc Naziunal anc betg pertutgà
Directamain n'è il perimeter dal parc naziunal anc betg pertutgà da las mesiras. Uschia n'èsi anc betg enconuschent co sanar il flum che passa tras il Parc Naziunal Svizzer. L'emprim dovria quai scleriment e era ils resultats da las mesiras actualas al batschigl, han confermà ils responsabels.
Parc Naziunal Svizzer en il dilemma
Per il Parc Naziunal Svizzer e la situaziun in zic ina situaziun da pat. D'ina vart è il chantun obligà da realisar las mesiras necessarias per allontanar il PCB. Da l’autra vart è in dals impurtants princips dal Parc Naziunal Svizzer da surlaschar la natira a ses decurs.
RR actualitad 07:00