Siglir tar il cuntegn

Header

Navigaziun

Samedan
Legenda: Samedan na decida betg anc davart la transfurmaziun da l'Ovra electrica en ina societad d'aczias. RTR
cuntegn

Engiadina Ovra electrica Samedan: nagina decisiun questa saira

La suprastanza communala da Samedan ha decidì da retrair la tractanda davart l'Ovra electrica da la vischnanca. I dettia anc memia bleras malsegirtads davart la transfurmaziun da l'ovra en ina societad d'aczias.

En ina communicaziun a las medias scriva la suprastanza communala da Samedan ch'els hajan constatà memia bleras dumondas avertas tar la populaziun. Quai suenter ch'els hajan tramess il messadi e la glista da tractandas per la radunanza communala da gievgia saira.

Transfurmar l'Ovra electrica en ina societad d'aczias

La suprastanza communala propona da transmidar l'Ovra electrica da la vischnanca en ina societad d'aczias. 51% da las aczias restassan tar la vischnanca, 49% da las aczias cumprass il concern d'energia Repower. Ussa dettia quai anc dumondas avertas, surtut quai che reguarda il contract d'obligaziuns per acziunaris, il contract per la gestiun da l'ovra ed il contract per surprender ils indrizs da producziun. Perquai vul la suprastaza anc ina giada repassar ils documents e preschentar la tractanda pli tard puspè a la radunanza communala.

Commerzi e mastergn beneventan la suspensiun

L'uniun da commerzi e mastergn da Samedan e Bever beneventa la decisiun da la suprastanza communala. Quai resorta d'in scriver als commembers. La suprastanza da l'uniun scriva ch'ina haja discutà intensivamain la fatschenta cun la suprastanza communala e ch'ins haja constatà detagls che sajan anc da surlavurar.

Cura che la radunanza communala da Samedan decida uss davart la transfurmaziun da l'Ovra electrica en ina societad d'aczias n'è anc betg cler.

RR novitads 12:00