Siglir tar il cuntegn
Inhalt

Engiadina Optimissem malgrà perdita da milliuns tar l'Institut Otalpin Ftan

L’onn da gestiun 2016/17 ha l’Institut Otalpin Ftan fatg in minus da bundant 2,3 milliuns francs. Quellas cifras n'èn betg ina surpraisa ed èn en il rom dal plan da fatschenta ch'è vegnì preschentà avant 3 onns.

Il cussegl administrativ da l'institut Otalpin Ftan cun il president Jon Peer
Legenda: Il cussegl administrativ da l'institut Otalpin Ftan cun il president Jon Peer Reto Mayer

Sco quai che Jon Peer, il president dal cussegl administrativ da l'Institut Otalpin, ha ditg a la radunanza generala, pudess il resultat esser meglier – ma il minus era previs. Previs era er in segund augment dal chapital d’aczias e quai è vegnì approvà la sonda, ils 9 da december. I sa tracta dad in augment dal chapital d'aczias dad 1.2 milliuns francs. L'emprim augment da 3.8 milliuns francs è vegni realisà l'emprima mesadad dal 2017.

Augment gartegià grazia ad investurs gronds

L’augment d’aczias è stà tenor Jon Peer stentus. En la regiun èsi vegnì segnà memia paucas aczias, uschia han ils responsabels stuì ir a la tschertga d'auters investurs. Dad ina vart ha cumprà la gruppa da furmaziun Svizra-Asiatica SCC Education Group SA aczias per 1 milliun francs, sco segund han la Matthias Gubler SA e la Forum Capital Management SA era segnà in grond pachet d’aczias. Uschia che quellas 3 firmas possedan uss ina maioritad d’aczias da l'Institut Otalpin Ftan.

RR actualitad 07:00