Il project custa sis milliuns francs. La vischnanca Val Müstair paja trais milliuns francs. Il chantun Grischun e la Confederaziun pajan dus milliuns francs. Plinavant augmenta Minschuns ses chapital d'aczias per 1 milliun francs. Aczias en la valur da 600'000 francs èn gia segnadas, ils ultims 400'000 francs èn ins ussa vid ramassar.
Ussa dovri anc ils permiss
La finanziaziun è damai garantida. Ussa sto Minschuns inoltrar ils projects tar il chantun per survegnir ils permiss. Vito Stupan, il president dal cussegl d'administraziun da Minschuns è optimistic che las proceduras èn finidas uschia ch'ins po cumenzar cun la fabrica l'atun 2018. Il project prevesa ina nova telecabina da Tschierv a Minschuns ed in nov sistem per ennavar.
Stagiun difficila
La stagiun d'enviern passada è stada difficila per Minschuns. Quai pervia da la mancanza da naiv. Ils acziunaris dals implants da sport Minschuns han dentant tuttina pudì approvar in quint cun in pitschen gudogn da radund 3000 francs. Quai surtut pervia che Minschuns ha pudì prestar lavurs en connex cun las etappas dal Tour de Ski en Val Müstair e pervia dal fatg che il mais favrer 2017 ha purtà fitg bunas entradas.
RR novitads 12:00