L'onn 2015 è enconuschentamain stà in onn difficil per il turissem en Grischun, ma era en l'Engiadina Bassa. La destinaziun Scuol, Samignun, Val Müstair ha pers 5% tar las pernottaziuns en ils hotels.
L'onn 2016 saja in onn difficil ha ditg urs Wohler, il schef da la destinaziun Scuol, Samignun, Val Müstair a la preschentaziun da las finamiras 2016 a Scuol. Sche l'hotel Schweizerhof a Vulpera serra sias portas e l'hotel Schweizerhof a Sta. Maria resta serrà, lura perda la destinaziun anc ina giada radund 60'000 pernottaziuns. E vid il curs bas da l'Euro na pon ins betg midar insatge. Uschia na resta betg auter che da pruvar da preschentar uschia bain sco pussaivel la regiun sco lieu attactiv per far vacanzas.
Urs Wohler è persvadì ch'ins stoppia ussa simplamain far buna lavur e trair a niz chaussas sco il hype enturn Uorsin. Il film vegn ussa en ils kinos en Germania. Perquai speran ils turisticers che quels maletgs fetschian gust da vegnir en las muntognas grischunas. Era la preschentscha da Uorsin en il Europapark a Rust saja in gronda reclama per l'Engiadina Bassa. En pli saja quai necessari ch'i dettia dapli cooperaziuns e collavuraziuns en la branscha ha ditg Wohler envers Radiotelevisiun Svizra Rumantscha.