Dapi il 1. zercladur 2017 è la Diavolezza-Lagalb en possess da la nova societad che vegn gestiunada dals responsabels da la Corvatsch SA. La perdita da bun 940’000 francs l’onn 2016/17 na saja perquai era betg da congualar, ha suttastritgà il president dal cussegl administrativ, Franco Tramèr.
2.3 milliuns differenza
Sco che la societad scriva en ses rapport annual, haja la famiglia Niarchos dà d’emprest 2.3 milliuns francs per pajar la differenza da las duas muntognas a la Engiadina Mountains SA. Ultra da quai haja la Diavolezza-Lagalb SA gì da far pliras investiziuns betg prevesidas per la nova gestiun.
Futur per Lagalb
La finamira da la societad saja da segirar vinavant la regiun da skis da la Lagalb. Quai è dentant be pussibel cun l’agid d’ina ferma partenaria sco la Diavolezza, uschè Tramèr. Dentant saja da far anc bleras investiziuns ils proxims onns. La blera naiv da quest onn, dettia dentant buna speranza per l’avegnir da l’interpresa.