Siglir tar il cuntegn

Engiadina OEE – bleras sfidas ed activitads da construcziun

A la 63avla radunanza generala da las «Ouvras Electricas d'Engiadina» èn ils tschains d’aua, il pretsch da la forza electrica e las lavurs da construcziun stads ils temas.

L’onn 2016/17 saja stà in difficil per ils implants idraulics: 17% damain producziun da forza electrica causa pauca naiv ed ina stad relativamain sitga. Il pretsch per la forza electrica sa chattia giun tschaler, uschia ha resumà Martin Schmid la situaziun a la radunanza generala da las Ouvras electricas d'Engiadina OEE.

Radund 30 milliuns han las OEE investì l’onn passà en projects, tranter auter en la lingia sutterrana da Bever a Pradella sco era en il project cuminaivel GKI (Gemeinschaftskraftwerk Inn) tranter la Svizra e l’Austria. Pervi da privel da bovas ruaussan las lavurs da construcziun sin quest plazzal enfin l'avrigl.

Ova Spin è puspè en funcziun

Il schaner aveva ina lavina cupitgà ina pitga d’auta tensiun sin il Pass dal Fuorn. Causa quai è l’ovra electrica Ova Spin stada ord funcziun pliras emnas. Quest'emna è vegnida montada ina pitga provisorica uschia ch l’ovra po puspè producir forz’electrica. Il donn da questa interrupziun da manaschi munta a circa 1 milliun francs.

Suenter set onns maghers spereschan ins sin set onns grass.
Autur: Martin SchmidPresident dal cussegl d'administraziun

Tuttina èn ils responsabels da las OEE persvadì che la producziun da forz’idraulica haja era en l'avegnir success.

RR actualitad 17:00