Gia il 2012 – cura che las inquisiziuns da la WEKO han cumenzà – aveva RTR empruvà da contactar Adam Quadroni. Quella giada na vuleva el dentant betg prender posiziun.
Uss suenter ils artitgels da la gasetta online «Republik» e la decisiun da la WEKO, ha Quadroni bain discurrì cun RTR, saja quai durant plirs telefonats ed era durant in inscunter persunal. Durant quels ha el era adina puspè empermess in’intervista. Il termin per quella è dentant adina puspè vegnì spustà.
Ils advocats intervegnan
Persuenter han tant l’advocat da Quadroni, sco er l’anteriur derschader federal Giusep Nay, surprendì tut ils contacts cun las medias ed els han fatg pretaisas envers RTR. Uschia han els vulì cundecider tge dumondas ch’ins possia far ad Adam Quadroni e tgeninas betg. Quai na correspunda betg a las directivas publicisticas dad RTR.
Strategia da medias
Cun tgi che Quadroni discurra cura, han ils advocats empruvà da manischar. Uschia ha il Whistleblower discurrì suenter l’artitgel en la «Republik» cun la «Schweizer Illustrierte» e cun la «Rundschau» dad SRF. A RTR è adina puspè vegnì ditg da spetgar.
Per Radiotelevisiun Svizra Rumantscha è tut quai stà il motiv da decider, da betg far in'intervista cun Adam Quadroni. Almain entant che las dumondas che interesseschan il public n’èn betg pussaivlas.
RR actualitad 12:00
