Il lieu dal nov center regiunal per l‘Engiadin’Ota e la Bregaglia è previs sper la staziun da Samedan. Il chantun e la Viafier retica han entant suttascrit in contract preliminar davart l’acquist dal terren. Cun centralisar tut ils uffizis chantunals en in lieu saja la collavuraziun pli effizienta ed chaschunia er damain custs per las localitads. Sche tut va tenor plan cun permiss e consentiment da la populaziun grischuna, cumenzan las lavurs da construcziun en quatter onns. L’avertura dal nov center administrativ, cun 120 plazzas da lavur il segund grond center regiunal dal chantun, fiss previs la primavaira 2025.
9 centers en 12 onns
Cun metter ils servetschs chantunals sut in tetg en in center regiunal na perdia la periferia betg exnum, uschia il cusseglier guvernativ Mario Cavigelli. Michael Pfäffli ch'è en la suprastanza da San Murezzan e dal medem avis. Er sche San Murezzan perdia il post da polizia al nov center a Samedan.
Sumegliant ha quai era tunà cura ch'il chantun ha realisà l'emprim dals total nov centers a Glion. La eran blers leds da pudair salvar almain intginas plazzas en la regiun ord spir tema da stuair dar giu ellas a Cuira. Però lunsch da la Surselva siador ch'ins gieva e pli gronda che l'opposiziun vegniva, sa regorda p. ex. l'anteriur president communal da Mustér, Dumeni Columberg.
RR actualitad 07:00