Siglir tar il cuntegn
Inhalt

Engiadina Nova senda tranter Segl ed Isola?

Las vischnancas da Segl e Bregaglia vulan refar in traject da radund 800 meters da la senda tranter Segl ed Isola. In project sensibel; la cuntrada stat sut protecziun naziunala.

Lej da Segl
Legenda: La vista sin il Lej da Segl davent da la senda da viandar tranter Segl ed Isola RTR/David Spinnler

La senda da viandar tranter Segl ed Isola sper il Lej da Segl vegn duvrada adina dapli er da velos sper ils viandants durant la stad. Durant l'enviern pon ins duvrar il lai per loipas e sendas da viandar – durant in spazi da temp che vegn adina pli curt.

Ina senda nova è in'idea difficila da realisar

Perquai vulan las vischnancas da Segl e Bregaglia reagir e construir ina nova senda sin in traject da radund 800 meters tranter Segl ed Isola. Il nov toc da la senda duai esser 2,5 meters lad. In'idea betg simpla en ina cuntrada ch'è en l'inventari da las cuntradas da muntada naziunala.

Visita sin il lieu duai gidar a chattar ina soluziun

Per evaluar opziuns han las vischnancas envidà ils uffizis chantunals e l'organisaziun da protecziun Pro Lej da Segl ad ina visita oculara. Quai per guardar da princip tge ch'ins savess realisar.

Las vischnancas han retschavì signals positivs per duas variantas: Schlargiar la senda existenta u construir ina senda propi lung la riva dal lai. Quella stuess'ins per part pender vid il grip.

Ina gruppa da lavur duai ussa examinar pli en detagl las duas variantas.

RR actualitad 12:10