Siglir tar il cuntegn

Header

cuntegn

Engiadina Nova lescha da turissem per la Val Müstair

La lescha fixescha taxas pli autas per garantir la summa da radund 500'000 francs che la Val Müstair sto pajar sco commember da la destinaziun Engiadina Scuol Samignun Val Müstair e per mantegnair l'infrastructura turistica.

La radunanza communala da la Val Müstair ha ditg gea cleramain cun 73 encunter 2 vuschs a la nova lescha da turissem. La lescha è la consequenza da la decisiun da la Val Müstair dal zercladur 2014 da restar part da la destinaziun Engiadina Scuol Samignun Val Müstair.

Questa decisiun ha per consequenza che la Val Müstair sto pajar radund 450'000 francs sco commember da la destinaziun. Quai èn radund 120'000 francs dapli che avant e correspunda a radund 10% da las aczias da la destinaziun. Latiers vegnan custs per mantegnair infrastructura turistica. La nova lescha fixescha en detagl las taxas da giasts e las taxas da turissem. La lescha da turissem sto ussa anc passar la votaziun a l'urna en Val Müstair che è ils 5 da zercladur.

Biosfera cun novs statuts

En pli ha ditg gea la radunanza communala da Val Müstair unanimamain als novs statuts da la Biosfera Val Müstair. Ils novs statuts determineschan la Biosfera sco instituziun dal dretg public da la vischnanca. La suprastanza communala è nov responsabla per la direcziun strategica da la Biosfera e n'è betg pli integrada en la gestiun operativa. Ensemen cun la suprastanza communala decida ina cumissiun da la Biosfera davart la strategia da la Biosfera. En quella cumissiun èn rapreschentadas diversas gruppas d'interess sco l'economia ed il turissem, las organisaziun per la protecziun da l'ambient u la perscrutaziun.

Artitgels legids il pli savens