Las uniuns d’hoteliers en Engiadin’Ota hajan gia collavurà ils ultims onns areguard differents temas, uschia la communicaziun. La situaziun difficila en connex cun la pandemia da corona haja anc intensivà la collavuraziun. Perquai han las suprastanzas da las uniuns decis da s’unir ad ina cuminaivla.
L’uniun fa la forza
Cun questa collavuraziun possia l’hotellaria en Engiadin’Ota era crescher ensemen pli ferm, e trair a niz las sinergias. Uschia vegnian ins era recepids sco unitad, vegn cità il president da la nova organisaziun tetgala HotellerieSuisse Engiadin’Ota, Andrea Isepponi che represchenta l’hotellaria da Puntraschigna. Sper el fan part a la suprastanza: Christoph Schlatter (San Murezzan), Jürg Wintsch (Malögia/Segl/Silvaplauna) e Jürg Degiacomi (Engiadina d’amez).
Per betg midar tut ils statuts da las singulas uniuns, na saja la nova organisaziun tetgala betg ina fusiun giuridica. Las uniuns d’hoteliers en Engiadin’Ota restian vinavant en funcziun.