Siglir tar il cuntegn

Header

video
Ulteriur project d'hotel a Schlarigna
Or da Actualitad dals 07.09.2016.
laschar ir. Durada: 1 minuta 32 Secundas.
cuntegn

Engiadina Nov project d’hotel a Schlarigna

Investiders privats vulan realisar in hotel da trais stailas cun 55 stanzas sin ina parcella sper la pista d’enviern a Schlarigna. Emprima premissa è uss in midament da zona dal terren.

Hotel Fontana a Schlarigna
Legenda: Il project Hotel Fontana duess vegnir realisà gista sper la pista da la regiun da skis Marguns. mad

La parcella che sa chatta en il quartier da Provuler a Schlarigna, duess vegnir transmidada da la zona agricula en ina zona da fabrica. Per far quai vuli il consentiment da la populaziun.

Per finanziar il project da bun 20 milliuns francs, prevesa la famiglia tessinaisa Fontana, che posseda la parcella a Schlarigna, da realisar sper l’hotel er trais abitaziuns secundaras en il project.

Cussegl communal beneventa project

Sco che la suprastanza communala da Schlarigna scriva en la missiva, haja ella grond interess vi d’in nov hotel en vischnanca. Ils ultims onns han differents hotels gì da serrar las portas ed èn vegnids transmidads en abitaziuns secundaras.

Schlarignots han gia sbittà plirs projects

Dus projects per novs hotels a Schlarigna n’ha la populaziun betg acceptà ils ultims onns:

Ina nova gestiun d’hotel en il sectur da trais stailas, fiss bainvesida en vischnanca e gidass er ad augmentar las frequenzas da giasts a Schlarigna. Previs saja in hotel cun in concept fitg modern, ha declerà l’advocat Galfetti, che represchenta la famiglia Fontana.

audio
Project d'hotel da fans da Schlarigna
ord Novitads dals 07.09.2016.
laschar ir. Durada: 2 minutas 58 Secundas.

Er pendicularas èn vid in nov project

Sin l’areal dal parcadi Marguns da las pendicularas, saja la societad er vid in nov project da surfabricaziun, ha tradì il suprastant communal da Schlarigna, Riet Ganzoni. Davart las dimensiuns e termins concrets na poss ins dentant anc dir nagut.

Decider al medem mument

Per ch’ils votants sajan infurmads en detagl davart il project da l’Hotel Fontana a Schlarigna, orientescha la suprastanza en ina radunanza ils 12 da settember 2016. Pussaivel saja, uschè Ganzoni, ch’il project vegnia ensemen cun in nov project da las pendicularas Engiadina San Murezzan Mountains gia proxim onn davant radunanza communala.

Artitgels legids il pli savens