Siglir tar il cuntegn
Inhalt

Engiadina Nov lieu dal CSI San Murezzan è sa cumprovà

Leta Joos po trair ina buna bilantscha suenter il turnier da chavals d’auta classa en Engiadina. Per l’emprima giada è la concurrenza da sigl da tschintg stailas stada situada a l’ur da la vischnanca da San Murezzan e betg pli sin il prà da Polo.

Leta Joos e chavaliers
Legenda: Fatschas cuntentas al turnier da tschintg stailas a San Murezzan. mad

ll nov lieu per il turnier da CSI San Murezzan, l’areal da San Gian dador la vischnanca en direcziun Champfèr, saja surtut stà ideal or dal punct da vista sportiv, ha declerà la CEO da l’occurrenza, Leta Joos. Grazia a l’areal pli grond e spazius hajan ils 312 chavals a la partenza cun lur patruns er pudì trenar e sa stgaudar en sin quatter differentas plazzas.

Bunas colliaziuns

Ch’ils chavaliers da renum èn stads a la partenza a San Murezzan, haja d'ina vart da far cun las bunas conuschientschas che Leta Joos e ses partenari Beat von Ballmoos han en la scena da chavals.

Da l’autra dentant er cun il fatg ch’ils organisaturs tgiran er bain il rapport cun ils famegls, ils uschenumnads «grooms». Quels vegnian er adina puspè envidads a gentar ed a tschaina.

Acquisiziun difficila

Quant ch’il nov lieu senza la culissa enconuschenta da San Murezzan cun il lai vala als sponsurs, hajan ins uss dad evaluar. Dentant pir suenter ch’ins haja serrà giu tut ils quints, ha suttastritgà Leta Joos. Il budget da trais milliuns francs vul ins en mintga cas betg surpassar quest onn.

Perspectiva d'utschè dal areal San Gian
Legenda: Il nov areal San Gian dal CSI San Murezzan. mad

Datas e lieu fix

Gia fixà en l'agenda dals chavaliers è la data da las proximas duas ediziuns dal CSI San Murezzan. Il turnier da tschintg stailas vegn puspè ad avair lieu enturn ils 20 d'avust. La discussiun davart la plazza dal turnier saja entant er evasa. Tenor Leta Joos sajan ins s'endisà vid il nov lieu San Gian a San Murezzan.

RR actualitad 17:00