Previs è che la nova dimora da la canorta vegn ad esser en la chasa communala a Puntraschigna. Avant far midada vegnia la chasa sanada a moda energetica, e las localitads adattadas als basegns d’ina canorta, ha declerà il chanzlist da Puntraschigna, Urs Dubs.
Scola dovra dapli plazza
Cun quai ch’il dumber d’uffants creschia ils proxims onns marcantamain a Puntraschigna, haja la scola grond basegn d'ulteriuras localitads. Cun dar liber la chasa communala, vegnia a dar spazi liber. Sin l’emprim plaun è prevesida la nova canorta.
Chanzlia mida en il Rondo
L’administraziun communala da Puntraschigna vegn a far midada en localitads dal center da congress Rondo. Sco la manadra da gestiun da la KIBE Alice Bisaz ha ditg ad RTR, saja tut la planisaziun anc fitg frestga ed ils plans concrets hajan pir da vegnir elavurads las proximas emnas. Ella ha dentant pudì confermar ch’i na vegnia betg a dar ina nova tschintgavla canorta en Engiadin’Ota, mabain ina soluziun definitiva per la canorta existenta.
Davent d'ina situaziun provisorica
Actualmain è ina da las duas canortas a Samedan, la «Libella», en localitads provisoricas e betg propi adattadas per uffants. Las 12 plazzas da quella vegnian transferidas en la nova canorta a Puntraschigna. Ultra da quai van sis plazzas ch’èn provisoricas a San Murezzan er a Puntraschigna.
Dapli detagls davart la finanziaziun e termins na sajan anc betg avant maun, ha ditg la manadra da la KIBE Engiadina. Il transfer en la nova canorta a Puntraschigna vegn dentant ad esser il pli baud per l’enviern 2018/19.
Actualmain porscha la KIBE Engiadina la tgira d’uffants en quatter canortas en Engiadin’Ota: a San Murezzan, en dus lieus a Samedan ed a Zuoz.
RR novitads 12:00
