Dapi duas emnas lavuran las maschinas grondas amez vischnanca a Puntraschigna. L'hotel Post, fabritgà l'onn 1890, vegn stratg giu. La famiglia indigena cun experientscha en l'hotelleria Bettina e Richard Plattner bajegian in nov hotel, che vegn realisà en moda d'ibrid. Vul dir, i dat in hotel cun 36 stanzas, 5-7 abitaziuns gestiunadas e 5 segundas abitaziuns. Quellas 5 segundas abitaziuns gidan a finanziar l'entir project, che custa radund 22 milliuns francs.
In lieu da scuntrada per indigens e giasts cun maisa radunda
Gia pli baud era l'hotel Post quel lieu da scuntrada per ils Puntraschignots. Quai duess esser era en l'avegnir il cas. Giuven e vegl, indigen e giast sa duessan sentir bain qua.
Gnanc uschè simpel
L'hotel Post è in stabiliment – degn per vegnir mantegnì – ils plans, da strair giu l'hotel, han perquai stuì vegnir approvads da la radunanza communala da Puntraschigna ma era da la regenza grischuna. Tuttas duas instanzas han dà glisch verda per il project. Quest atun ston ils Plattners ensemen cun l'architect da renom Gion A. Caminada elavurar ils plans definitivs per pudair inoltrar la permissiun da construcziun. Previs è che l'hotel pudess avrir sias portas per la stagiun d'enviern dal 21/22.
TR Telesguard 17:40