Siglir tar il cuntegn
cuntegn

Engiadina Nov cussegl da fundaziun per la Manufactura Tessanda Val Müstair

Peder Andri, president dal util public Val Müstair, la dissegnadra da textil e magistra da tessunzas Barbara Wälchli-Keller e Cla Filip Pitsch, suprastant da la vischnanca da Val Müstair, duain pigliar en maun ils mastrins da la Tessanda a Sta. Maria.

Els trais.
Legenda: Peder Andri, Barbara Wälchli-Keller e Cla Filip Pitsch èn ils novs (da san.). montascha RTR

Suenter che l’anteriur cussegl da fundaziun, sut la batgetta da Gabriella Binkert Becchetti aveva demissiunà in corpore, èsi ussa gartegià al administratur ad interim, Michael Conrad, da chattar novs commembers per il cussegl da fundaziun. Conrad era vegnì incumbensà dal chantun Grischun sco administratur ad interim.

Numer da commembers variabel

Michael Conrad motivescha la determinaziun da sulettamain 3 persunas en il cussegl da fundaziun uschia, ch’ils novs commembers Andri, Pitsch e Wälchli-Keller, duain decider quants ulteriurs commembers ch’els vulan anc determinar.

Involver dapli las tessunzas

La finamira saja da chattar anc ulteriuras persunas cun ina savida speziala en il sectur da marketing, ha declerà l’administratur ad interim. Trais saja la cifra minimala per il nov cussegl da fundaziun tenor incumbensa dal chantun. Sper il nov cussegl, vuli ins er integrar dapli las tessunzas en il manaschi da la Tessanda Val Müstair.

Michael Conrad.
Legenda: Michael Conrad L’administratur ad interim ha definì las trais persunas che duain puspè manar quietezza e constanza en il manaschi. Anna Caprez

Fin la fin da matg resta Michael Conrad anc en uffizi sco administratur ad interim. Lura surpiglia il nov cussegl da fundaziun la gestiun.

La Fundaziun Manufactura Tessanda Val Müstair ha il scopo da promover l’artisanat da taisser a maun sco professiun. Actualmain lavuran 10 persunas en la Tessanda Val Müstair.