Siglir tar il cuntegn
Inhalt

Engiadina Nov center da cumpra fa quitads als affarists da Samedan

L'onn 2021 duai il nov center da cumpra en il quartier Cho d'Punt a l'ur da la vischnanca avrir. Enfin lura duai esser cler co il center dal vitg da Samedan duai restar attractiv per indigens e turists.

Legende: Video Ils plans dal Migros a Samedan procuran per intschertezza abspielen. Laufzeit 03:24 Minuten.
Or da Telesguard dals 09.10.2018.

Las reacziuns en vischnanca èn differentas. Da gronda tema d'in center dal vitg vid enfin a novas schanzas per il vitg, è d'udir tut.

Ch'ins na possia dentant betg spetgar giu enfin tar l'avertura è conscient a tuts, er al president communal Jon Fadri Huder. I dettia perquai ina gruppa da lavur che cumenzia proximamain a ponderar, co attrair era en avegnir glieud en il center istoric da Samedan.

Bleras ideas pli u main realisticas

Tenor ils affarists dovri differentas chaussas per mantegnair l'attractivitad dal center da Samedan. Lur ideas cuntegnan parcadis, occurrenzas regularas sco martgads ni era sustegn finanzial per las butias.

Gist quai na vegnia dentant betg a dar, fa Jon Fadri Huder cler envers RTR. La vischnanca vegnia pli probabel a sa concentrar sin porscher l'infrastructura e procurar per occurrenzas.

Emprims resultats da la gruppa da lavur èn da spetgar enfin il pli baud en dus mais.

Avertura dal center il 2021

En il nov center da cumpra investescha il Migros var 50 milliuns francs, ed el duai porscher radund 100 plazzas da lavur novas. Dasper l'emprima butia dal Migros en Engiadina duai era dar spazi per butias pitschnas en il bajetg.

RR actualitad 07:00