In’emna avant la gronda cursa populara, il Maraton da skis engiadinais, partan bun 900 curriduras a Samedan en direcziun S-chanf per la cursa da dunnas.
Nov è la partenza quest onn en l’arena da sport Promulins e betg pli sco usità ils ultims 15 onns tar la plazza aviatica da Samedan.
Meglra infrastructura
Cun quest midament possian ins porscher ina meglra infrastructura a las passlunghistas. Il nov lieu da partenza haja damain plazzas da parcar, è però pli datiers a las staziuns dal traffic public. Il traject da Samedan a S-chanf da 17 km daventia radund in mez kilometer pli lung cun il sviament da la loipa sur Bever.
Marca magica
Sco ch’il president dal Maraton da skis engiadinais, Ivo Damaso ha declerà, veglian ins cuntanscher quest onn sche pussaivel la marca magica da 1’000 participantas.
Il fatg che la data da la cursa da dunnas sa cruscha quest onn cun il 1. da mars – il di da Chalandamarz en Engiadina – haja damain annunzias per consequenza.