Siglir tar il cuntegn

Header

Navigaziun

cuntegn

Engiadina Minschuns tira en offertas per nova sutgera

Proxim onn po la societad «Implants da skis Minschuns» festivar giubileum. L’onn 1976 avev’ins realisà ils emprims dus runals era a Sot e Minschuns ed uschè lantschà l’emprima stagiun da skis alpin en la regiun.

Chamona
Legenda: La regiun da skis Minschuns. ANR

Dapi il 2000 ha la societad la pussaivladad da ennavar singulas pistas cun chanuns. Sco ch’il president dal cussegl administrativ, Vito Stupan ha declerà ad RTR, sajan ins uss vida trair en offertas per concretisar il project d’ina sutgera da quatter. Quella colliass Tschierv cun Alp da Munt en la regiun da skis da Minschuns.

Sper la sutgera examinesch'ins er las pussaivladas a reguard ina lingia d'aua cumbinada cun la funcziun da serenera. Il favrer 2016 fan ins quint da pudair communitgar ils proxims pass e detagls en chaussa.

Quint cuntegna er mantegniment loipas

Il rendaquint 2014/15 da la «Implants da skis Minschuns SA» serra cun in pitschen gudogn da bun 500 francs. Nov fan part per l’emprima giada al quint er las loipas en Val Müstair. La societad ha surpiglià l’incumbensa da la vischnanca per in temp da prova da trais onns.

La radunanza generala ha plinavant elegì l'architect Jon Domenig da Cuira en il cussegl administrativ.

En occasiun dal giubileum envida la regiun da skis Minschuns ils 23 e 24 da schaner 2016 a tuts sin la muntogna per festegiar.

RR novitads 15:00