Siglir tar il cuntegn

Engiadina Midar opiniun pon'ins

Gabriella Binkert Becchetti declera sia midada d'opiniun entaifer 24 uras: suenter che ella aveva annunzià da sa retrair da la politica locala candidescha ella tuttina per la suprastanza communala da la Val Müstair

Gabriella Binkert Becchetti.
Legenda: Midar opiniun pon'ins, di Gabriella Binkert Becchetti e candidescha per la suprastanza communala da la Val Müstair. RTR/David Spinnler

Gabriella Binkert Becchetti (Pps) declera sia midada d'opiniun entaifer 24 uras: ella saja stada frustrada suenter l'elecziun per il presidi da la Val Müstair.

Quella elecziun ha ella pers ils 16 october cun 19 vuschs differenza encunter il nov president communal Rico Lamprecht (Pbd). Suenter quel resultat stgars haja ella vulì finir la carriera politica. Dentant haja ella lura gì fitg bleras reacziuns da persunas che hajan motivà ad ella da tuttina candidar per la suprastanza communala ed ella haja era sentì che la politica mancass ad ella.

L'uniun da gastro e mastergnants da la Val Müstair haja era decidì ch'i fiss bun sche ella candidess tuttina ha ditg Binkert envers Radiotelevisiun Svizra Rumantscha. Ins possia midar opiniun ha ditg Binkert enavant ed il fatg che ella haja midà opiniun infra stgars 24 uras na saja betg da valitar sco agir betg vardaivel.

Elecziuns ils 6 november

Las elecziuns per la suprastanza communala da la Val Müstair èn ils 6 november. Sper Binkert Becchetti candideschan anc 10 ulteriurs candidats per ils 6 sezs.