Siglir tar il cuntegn
Inhalt

Engiadina Midament da direcziun a l’Hotel Saratz a Puntraschigna

Il pèr Anuschka e Thierry Geiger-Starkloff banduna l’hotel da quatter stailas per la fin da fanadur 2018. La tschertga d’ina successiun ha gia cumenzà.

Hotel Saratz cun tschiel blau
Legenda: L'hotel da tradiziun va en tschertga d'ina nova direcziun. saratz.ch

Ils directurs mainan l’Hotel Saratz dapi il 2008. Suenter 10 onns s’haja il pèr decis da bandunar Puntraschigna, ha declerà il president dal cussegl d'administraziun, Gérard Jenni ad RTR. Ch’el saja gia intensivamain en tschertga da pussaivels successurs dal pèr Geiger. Ils hoteliers surpiglian questa stad la direcziun da la Aqua Spa Resorts cun 6 implants da wellness en tut la Svizra.

um e dunna cun uffant
Legenda: La famiglia Geiger banduna l'Engiadina per ils 31 da fanadur 2018. mad

Nova era per l'hotel da tradiziun

Il cussegl d'administraziun deplorescha che Anuschka e Thierry Geiger bandunan l’Hotel Saratz. Dentant è Jenni er persvadì ch’i cumenza ina nova era per l’hotel da tradiziun a Puntraschigna. Dad ina vart maina il Saratz a partir da questa stad il center da congress Rondo per la vischnanca da Puntraschigna, da l’autra possia l’interpresa er sa sviluppar vinavant cun novas energias a la testa.

Nagina vendita prevesida

Ramurs ch’i dess plans da vender l’Hotel Saratz, refusescha il president dal cussegl administrativ cleramain. L’hotel che ha entant in’istorgia da passa 150 onns saja e restia er vinavant en possess da famiglia, uschè Gérard Jenni envers RTR.

RR novitads 17:00