Il president dad Engiadina San Murezzan Hugo Wetzel vesa la midada radicala a la testa da la destinaziun da l'Engiadin'Ota sco schanza. La nova organisaziun turistica cun novas persunas a la testa possia sviluppar novas ideas ha ditg Wetzel a Radiotelevisiun Svizra Rumantscha. La directura Ariane Ehrat aveva annunzià sia demissiun per la fin da zercladur 2017 glindesdi. Hugo Wetzel, il president da la destinaziun sto terminar sia incumbensa la fin dal 2017 pervi da la limitaziun d'uffizi. E, fin la fin dal 2017 sto era esser terminada la reorganisaziun da la destinaziun. Quai pervi ch'il circul n'exista lura betg pli. Il circul è ussa purtader da la destinaziun.
Avegnir avert
L'avegnir da la destinaziun saja anc avert, ha ditg Wetzel. Il pli impurtant èn ussa tenor Wetzel las votaziun en tut las vischnancas da l'Engiadin'Ota per fundar la nova societad d'aczias Engiadina San Murezzan Turissem. Lura vul ins definir il cussegl administrativ da la nova societad. Pir suenter vegn ins ad eleger in nov CEO sco successur dad Ariane Ehrat. Wetzel sez è persvadì che la nova equipa po surpigliar ina buna organisaziun. El na saja betg in chapitani che bandunia la bartga che sfundra. La destinaziun stoppia bain cumbatter cun cundiziuns fitg difficilas, i saja dentant pussaivel dad avair success era en l'avegnir, ha ditg Wetzel.
