Siglir tar il cuntegn

Header

cuntegn

Engiadina Mez onn senza colliaziun da tren en l'Engiadina Bassa

Durant in mez onn dal 2019 na circuleschan nagins trens sin il traject tranter Lavin e Scuol. Quai per lavurs da sanaziun da plirs tunnels.

Il mars dal 2019 vegn serrada la lingia da tren tranter Lavin e Scuol fin il settember dal 2019. Il motiv èn sanaziuns dals dus tunnels tranter la staziun da Guarda e quella d’Ardez. Durant quel temp circuleschian però bus tranter Susch e Scuol, ha declerà Christian Florin da la direcziun da la Viafier Retica a las autoritads regiunalas durant ina visita en l'Engiadina Bassa.

Ils tunnels da Giarsun e da Magnacun che han ina vegliadetgna da 100 onns èn en ina zona geologica inquieta. Tras quai sa movan parts dals tunnels fin 2 cm per onn. Uschè hai dà spustaments da fin 2 meters. Questa sanaziun vegn a custar radund 40 milliuns francs. Per sanar ils tunnels d’ina lunghezza da passa 2 km uschè spert sco pussaivel, èsi necessari da serrar cumplettamain ils tunnels.

La Viafier Retica vul nizzegiar la serrada dal traject era gist per ina gronda part da las lavurs per la staziun da Lavin e da la staziun nova da Sagliains ost. Quai sche tut funcziuna sco planisà cun tut ils permiss, manegia Christian Florin. Quà fan ins quint cun investiziuns da radund 30 milliuns francs. Las lavurs a Lavin e Sagliains vegnan a durar fin il 2020.

RR novitads 12:00

Artitgels legids il pli savens