Radiotelevisiun Svizra Rumantscha RTR ha tschertgà e chattà il victur dal «Meet & Greet» a chaschun da la cuppa d’Europa e campiunadi svizzer da snowboard alpin a Scuol. Reto Barbüda d’Ardez cun sia entira famiglia dastgan s’inscuntrar l’enconuschent snowboardist Nevin Galmarini.
Nagin ester per ils Barbüdas, Nevin Galmarini è oriund d’Ardez, bler viva el a Turitg, ma ad Ardez è el restà fidaivel. Reto Barbüda posseda ina scrinaria ad Ardez ed è sez in sportist passiunà.
La famiglia Barbüda ha gì plaschì da quest inscunter. Prender il temp da star ensemen, discutar, mangiar e baiver insatge pitschen e quai tranter las qualificaziuns dal campiunadi svizzer. Per Nevin Galmarini èsi ina chaussa natirala da pudair discurrer cun fans e quai era anc da la medema vischnanca.
Campiun svizzer 2017
Nevin Galmarini ha gudagnà la concurrenza a Scuol ed è uschia campiun svizzer en il slalom gigant parallel da snowboard. Segund è Sebastian Schüler e terz Silvan Flepp da Cumbel.
Tar las dunnas ha Ladina Jenny gudagnà, avant Stefanie Müller da Tavau e Julie Zogg.
RR actualitad