Siglir tar il cuntegn
Inhalt

Engiadina Maraton da skis engiadinais ponderescha scenaris d’urgenza

Il mardi ha gì lieu ina seduta tranter la suprastanza dal comité d’organisaziun dal maraton, represchentants da las vischnancas ed ils responsabels per las loipas. Tema era surtut la dumonda: tge far pervi da la pauca naiv?

Da princip è vegnì discutà da far naiv sin reserva, apaina che las temperaturas permettan puspè quai. Tenor Martin Stupan, il schef traject dal maraton, saja la prontadad da far naiv e collavurar gronda. Anc stoppian ils represchentants da las vischnancas dentant discutar quai cun ils responsabels en las vischnancas.

«Il problem è la naiv che manca, ils lais èn buns»

Ennavar tut ils 42 kilometers na fiss il mument betg necessari, na fiss dentant era betg in'opziun, di Martin Stupan. Quai fiss bler memia lavur, tecnicamain probabel gnanc pussaivel ed era betg raschunaivel. Scenaris d’urgenza fissan en emprima lingia da spustar la partenza. Segl fiss in’opziun u era Silvaplauna.

Situaziun da naiv è differenta tut tenor lieu

Il Lai da Silvaplauna è il mument praticamain senza naiv, sin quel da Segl vesì or meglier. Precara è la situaziun tenor Stupan en il guaud da Staz. Las loipas en direcziun S-chanf percunter èn en congual en in bun stadi, era perquai che quellas èn gia vegnidas preparadas per la cursa La Diagonela.