Siglir tar il cuntegn
cuntegn

Engiadina Mantegnair in stgazi en la Val Fex

Suenter 6 emnas lavur intensiva, ha la Fundaziun «Cheva Plattas da Fex» pudì preschentar l’emprim resultat dal project als commembers. A la festa d’inauguraziun èn er stads preschents anteriurs lavurers da la Val Malenco ch’han passentà plirs envierns en la Val Fex.

Aut sur l’Hotel Fex, vid la spunda da Muott’Ota sin territori da Segl è la chamona da crappa che regorda puspè a sia funcziun oriunda. Dapi il 17avel tschientaner e fin la fin dals onns 40 vegniva anc producì plattas da Fex. Las plattas da crap d’ina grossezza da 1,5 fin 3 cm èn anc oz enconuschentas e da vesair sin tetgs e funs.

Dira lavur per ils «giovellai»

Per gronda part vegnivan lavurers da la Val Malenco – ils «giovellai» enviern per enviern entasum la Val Fex a sfender las plattas preziusas. Quai sut circumstanzas fitg difficilas. Il crap per las plattas da Fex – in crap cun bler fier – sa lascha numnadamain be sfender, cura ch’el è schelà. Perquai avevan ils lavurers da transportar ils crappuns or d’in tunnel chavà mintg’onn aposta, or en il liber. E laschar schelar ils craps durant plirs dis.

«Bait da rat»

Francesco Ganzoppo e Vino Vedovatti alias «Zinzerla» da la Val Malenco, els han passa 80 onns, sa regordan anc bain da lur envierns fraids en l’Engiadina. L’alloschi da fin 14 persunas en la pitschna tegia da be paucs meters sumegliava bunamain ad ina fora da ratuns, in «Bait da rat», uschè in anteriur lavurer da la Val Malenco.

Mantegnair in stgazi cultural

Cun l’emprima etappa dal project da la Fundaziun «Cheva Plattas da Fex» vuless ins mantegnair in stgazi e pudair mussar la lavur intensiva dal gudagnar las plattas preziusas er a giasts ed indigens.

RR actualitad 08:00