L’ultima giada che las dus lavinas da Vallanzun e Quadratschas sper Zernez èn stadas uschè grondas èra l'enviern 1951. Ma cun passa 3 fin 4 meters naiv la fin da schaner han quellas stgarpà cun sai bostga e crappa fin giu en la prada da la vischnanca. Quant grond ch’ils donns eran insumma, han ins pir realisà avant in mais, cura che la naiv è luada. Per ils purs e la vischnanca bunamain in schoc, quanta merda ch’è vegnida giu.
Tut sto ir svelt
Svelt era cler, senza agid è quai per ils purs impussibel d'insumma pudair segar questa stad puspè quella prada. Fadri Guler, il manader da las gestiuns tecnicas da Zernez, ha perquai dumandà agid tar il servetsch civil. La secziun da Turitg ha dà resposta e tramess questas emnas 30 fin 40 persunas che gidan a far urden. Era la scola da Zernez ha organisà dis da rumida cun lur scolars. En emprima lingia cuvernan roma e crappa la prada ed impedeschan a las flurs ed a l’erva a crescher. Plirs milli cubics vegnan uss ramassads ensemen e purtads davent. E quai va mo bain avant che l’erva n’è anc betg massa auta.
Avant dus emnas hai jau anc cartì che quai è impussibel che nus pudain mo ir a segar roma e crappa questa stad.
Ils custs che l’entira acziun da rumida chaschuna, vegnan surpigliads da la cassa chantunala per donns elementars.