Mals cumbatta vinavant per esser senza pestizids

La vischnanca sisum il Vnuost en il Tirol dal Sid ha decidì l'onn 2014 da betg pli admetter pesticids sin territori communal. Uss vul ins cumbatter vinavant per questa decisiun – e quai Malgrà ils virivaris actuals en il Tirol dal Sid

pumers destruids.

Legenda da maletgs: Pumers destruids suenter l'attatga cun glyphosat en la plantascha dad Ägidius Wellenzohn. RTR, David Spinnler

In clima plain agitaziun regna en il Tirol dal Sid sch'i va per la dumonda duvrar pesticids per cultivar la puma u betg.

Attatgas cun pesticids e plants avant dretgira

Il settember hai dà in'attatga sin la plantascha biologica da puma dal pur Ägidius Wellenzohn. E quests dis ha purtà plant il cusseglier guvernativ dal Tirol dal Sid Arnold Schuler encunter l'autur dad ina documentaziun critica envers il diever da pesticids.

Quests fatgs mussan, che la discussiun davart il diever da pesticids en l'agricultura è fitg delicata en il Tirol dal Sid.

Al «gea» da la populaziun èn seguidas las debattas giudizialas

La vischnanca da Mals vul dentant cumbatter vinavant per esser ina vischnanca senza pesticids. L'onn 2014 avevan ditg passa 75% da la populaziun «gea» a l'iniziativa encunter il diever da pesticids.

In tribunal ha dentant constatà, che la vischnanca n'avess betg gì la cumpetenza da decider en chaussa. In recurs encunter questa decisiun è pendent. La vischnanca ha lura mess en vigur in decret che impedescha de facto il diever da pesticids. Era cunter quel hai dà recurs. Quels èn vegnids sbittads.

Mals vul cumbatter vinavant

Uss vul il president communal Ulrich Veith cumbatter vinavant per la realisaziun da la voluntad da la populaziun da Mals. El spera, ch'i dat dapli dialog en avegnir per discutar furmas pussaivlas per l'agricultura - era senza pesticids.

RR actualitad 07:10