Siglir tar il cuntegn
Inhalt

Engiadina Malauras en Val Müstair han chaschunà donns da bun 220‘000 francs

In temporal intensiv aveva procurà numerusas bovas en Val Müstair l’emna passada. Pervi da la plievgia intensiva era vegnì giu er bler material dal Piz Daint. Quel era arrivà per part sin la via dal Pass dal Fuorn. Il pass era perquai stà serrà durant ina notg.

Las malauras dal venderdi passà en Val Müstair han chaschuna donns da var 220’00 francs.
Legenda: Las malauras dal venderdi passà en Val Müstair han chaschuna donns da var 220’00 francs. I. Andri

Entant ha l’uffizi forestal inventarisà per gronda part ils donns. El fa quint suenter ina emprima stima cun in donn da 220'000 francs. Sco quai che l’inschigner forestal da la Val Müstair, Livio Conrad ha declerà ad RTR, sa tractia per gronda part da donns da rempars, da differenta infrastructura, vias, infrastructura agricula, enchaschaments da sauaziun e punts.

Ins haja cumenzà immediat suenter il temporal ad allontanar material: quai surtut or dals batschigl da regulaziun ch’eran plainischems cun material. Tenor Livio Conrad vegni a cuzzar bun in mais per allontanar il material e reparar tut en Val Müstair.

Observar la situaziun

En vista a las previsiuns da l’aura per ils proxims dis cun plievgia intensiva, hajan ils responsabels adina en egl la situaziun dals lieus periclitads. Surtut ils chanals e batschigls d’aua ch’èn anc adina plains, vegnian observads cuntinuadamain. «Igl è dentant tuttina grev da prognostitgar, cunquai che l’aura sa mida fitg svelt», ha agiunt l’inschigner forestal.

L’ultima giada avevan bovas purtà material en val ils onns 80 en ina medema dimensiun.