Siglir tar il cuntegn

Engiadina Maisa radunda da las pendicularas Motta Naluns

Las pendicularas in Engiadina Bassa han envidà dacurt ad in inscunter cun represchentants da las vischnancas, l’hotellaria, il commerzi e mastergn, las scolas da skis ed auters partenaris da las pendicularas.

Andri Lansel
Legenda: Il president dal cussegl administrativ da las pendicularas Motta Naluns, Andri Lansel RTR, D. Spinnler

En il center da la discussiun e stada la stagiun d’enviern passada. Quella saja stada tut auter co buna. Sco ch’il president dal cussegl administrativ, Andri Lansel, ha ditg envers RTR, era la partenza da la stagiun d’enviern 2015/16 fitg nauscha.

Il mais da favrer dentant fitg bun, il mars bun e la Pasca la meglra dals ultims 10 onns.

Betg buna communicaziun

Ina problematica ch’ins vul schliar è che durant la stagiun passada n’èn las reclamaziuns dals giasts betg rivadas fin tar la direcziun da las pendicularas.

La gronda part da las criticas – saja quai positivas u negativas – èn pel solit rivadas be fin tar il persunal da las ustarias ed ils hotels en la regiun da skis e betg vegnidas dadas vinavant.

Megliurar ils chanals

Quest punct vulan las pendicularas meglierar en vista a la proxima stagiun d’enviern, ha declerà Andri Lansel. Plinavant vul ins era meglierar la communicaziun tranter las pendicularas ed ils giasts cun involver pli ferm er la gastronomia ed ils auters vecturs, ch'èn en contact cun ils giasts en val, che n’èn dentant betg en possess da las pendicularas.

Motta Naluns
Legenda: La regiun da skis Motta Naluns, Scuol, Ftan, Sent mad

Implant da far naiv anc quest onn

Ultra da quai han las pendicularas infurmà a reguard l’engrondiment dal implant da far naiv. Il permiss spetg'ins per las proximas emnas.

L’emprima etappa è la pista da la nova sutgera Prui-Schlivera che vegn realisada gia questa stad.

Finanziaziun betg anc garantida dal tut

La stad 2017 è prevesida la part da Ftan a Prui e dal 2018 la lingia da la val Tasna enfin a Ftan. Ils custs totals sa muntan ad 8 milliuns francs. La finanziaziun n’è anc betg garantida, ma ella saja sin buna via, uschia il president dal cussegl administrativ da las pendicularas Motta Naluns, Scuol, Ftan, Sent SA.