Siglir tar il cuntegn
cuntegn

Engiadina Lyceum Alpinum Zuoz cun resultat che cuntenta

La scola media engiadinaisa ha gì 11 scolars dapli durant l'onn da scola 2015/16. Il gudogn da l'interpresa è cun passa 1 milliun francs levamain pli bass che l'onn avant.

Lyceum Alpinum Zuoz
Legenda: Il Lyceum Alpinum a Zuoz è cuntent cun ses affar da l'onn da scola 2015/2016. RTR, David Spinnler

Il Lyceum Alpinum a Zuoz ha salvà sia 112avla radunanza d'acziunaris la sonda passada. La scola media engiadianisa ha pudì preschentar in resultat stabil. L'onn da scola 2015/16 han frequentà 199 scolars interns e 93 scolars externs il Lyceum. Quai èn 2 scolars interns e 9 scolars externs dapli che l'onn avant.

La scola ha generà il 2015/2016 ina svieuta pli auta cun 20.5 milliuns francs. Il gudogn avant amortisaziuns ed impostas importa 3.3 milliuns francs, quai è levamain dapli che l'onn avant. Suenter amortisaziuns ed impostas resulta in gudogn dad 1.1 milliuns francs. L'onn avant avevi dà in gudogn dad 1.4 milliuns francs.

Dapli letgs e stanzas da scola

Il Lyceum Alpinum communitgescha vinavant, che la construcziun da la chasa Urezza cun novas stanzas da scola e cun 65 ulteriurs letgs per scolars saja sin buna via. La construcziun da basa dal bajetg saja a fin. Era realisà ha il Lyceum durant l'onn 2016 l'attatg al stgaudament sin distanza.