Liongia da brassar e gulasch da pesch al White Turf

Durant trais fin d’emnas sin il lai schelà da San Murezzan sa raduna glieud da tut las differentas classas al White Turf. Dad ina vart ils chavaliers, jockeys, sportists cun tut lur gidanters, da l’autra vart ils aspectaturs che vegnan a giudair il spectacul.

giasts a sulagl

Legenda da maletgs: Ils giasts giaudan la bell'ora al White Turf RTR, A. Caprez

En tut visitan fin 35’000 persunas durant las trais fin d’emnas las cursas dal White Turf. Tranter quellas er mintga dumengia bun 700 giasts ch’èn envidads dals sponsurs da l’eveniment. Per els datti – sper la tradiziunala liongia da brassar sper la pista – in entir menu squisit servì en las tendas da VIP stgaudadas.

«  I na dat betg in NA per il giast »

Niculin Peter
Gamma Catering

Temperaturas chaudas fan quitads

Responsabel per la cuschina sin il lai è dapi passa 25 onns l’interpresa da catering “Gamma”. Niculin Peter da Bever è in dils responsabels per il bainstar dals giasts en las tendas exclusivas. Quest onn ha l’organisaziun gì da cumbatter cun plirs problems sin il glatsch. Oravant tut cun l’aua che smatga si a la surfatscha e na lubescha pli da duvrar tut las tendas.

Dumandà flexibilitad ed organisaziun

Perquai hajan ins gì da translocar per part las cuschinas en auters lieus ha declerà Niculin Peter. E singulas gruppas da giasts hajan quest onn er da mangiar dador la tenda las buntads exclusivas. Quai per evitar memia pais sin la vetta da glatsch en las tendas.

Terza dumengia cun 13’800 aspectaturs

Suenter ch’ils organisaturs han gì da desdir l’emprima dumengia da cursas e scursanir marcantamain ils trajects da la segunda, èn las cundiziuns da la vetta da naiv sin il lai schelà stadas acceptablas per l’ultima fin d’emna dal White Turf San Murezzan.

Spustà datas causa mastranzas mundialas da skis

Causa il champiunadi da skis a San Murezzan proxim onn, vegnan las datas dal White Turf spustadas per in’emna. Las cursas han lieu als 12, 19 e 26 da favrer 2017.