Lifestyle fitness - 10 kilos pli pauc grazia in program online

Esser independent, trenar cura e nua ch'ins vul senza anc stuair far lungs viadis en in center da fitness. Surtut pervi da quai ha Vanessa Padrun empruvà or in program online. Ma cler - insumma entschet haja ella pervi da las bleras fotografias da transfurmaziun ch'ella ha vesì sin facebook.

Vanessa Padrun avant il program online e suenter cun 10 kilos pli pauc sin las costas.

Legenda da maletgs: Vanessa Padrun avant il program online e suenter cun 10 kilos pli pauc sin las costas. mad

Vanessa Padrun

Legenda da maletgs: Vanessa Padrun avant e suenter ils 70 dis size zero. mad

Cun ina transfurmaziun è manegià il svilup d'ina persuna avant la dieta cun il trenament e suenter il program. En il cas da Vanessa Padrun suenter 70 dis «size zero». Ella ha pers 10 kilos ed ha survegnì ina figura pli definida, raquinta la giuvna da 22 onns.

Vanessa Padrun

Legenda da maletgs: Vanessa Padrun ha 22 onns mad

«  Size Zero ha da far nagut cun il numer da vestgadira. Finamira è da viver pli saun, daventar fit ed avair in corp definì. »

Vanessa Padrun

Ils 70 dis dal program eran dentant tut auter che simpel, i dovra blera disciplina di Vanessa. Quai che pertutga il plan da nutriment n'era ella sezza betg buna da sa tegnair vidlonder durant tut ils 70 dis - bler memia dir saja quai stà suenter las emprimas tschintg emnas. Lasuenter haja ella fatg enavant cun il program da sport e cun sa nutrir tenor il numer da calorias ch'è dà avant dal program, ma cun il nutriment ch'ella vuleva.

La fotografia da la vita manca anc

Il mument sa chatta Vanessa en ina segunda runda dal program. Sia finamira da tegnair en mauns la fotografia da sia vita quella n'ha Vanessa anc betg cuntanschì, di ella. Anc ina giada 10 kilos pli pauc - quai vul ella uss cuntanscher cun ina segunda runda «size zero».