Engiadina - Lavurar per il chaval e betg cunter - Novitads

Engiadina Lavurar per il chaval e betg cunter

Guido Balsiger fabritga ils percurs per las concurrenzas da chavals CSI a San Murezzan. Ina lavur delicata che pretenda bler sentiment.

Autur: David Spinnler / Dario Müller

Guido Balsiger è profi en construir percurs da concurrenzas da chavals sco il CSI a San Murezzan. Balsiger lavura en tut l'Europa ed el ha fatg ils percurs da tut ils trais turniers CSI ch'i ha dà enfin ussa a San Murezzan. La responsabladad per ils percurs è ina lavur delicata per in turnier da la categoria la pli auta cun 5 stailas. Tut sto correspunder als reglaments e las mesiras ed autezzas ston esser correctas.

audio

Guido Balsiger fabritga ils percurs dal CSI a San Murezzan

ord Actualitad dals 18.08.2017.

laschar ir. Durada: 2 minutas 53 Secundas.

Sustegnair ils moviments natirals dals chavals

Ma per construir in bun percurs ston ins tenor Guido Balsiger era avair in bun sentiment. Balsiger di che ses stil sajan percurs radunds che sustegnian ils moviments natirals dals chavals. Ins duaja lavurar cun ils chavals e betg cunter els di Balsiger. Leta Joos – la directura dal CSI a San Murezzan è intgantada da la lavur da Balsiger.

Ensemen cun Balsiger lavura ina squadra da 20 persunas che gidan da fabritgar ils percurs da tut las concurrenzas ch'han lieu a San Murezzan enfin dumengia.