Siglir tar il cuntegn
Inhalt

Engiadina La Weko na commentescha betg - Quadroni sa defenda

La cumissiun da concurrenza Weko na vul betg commentar ils arguments da la gruppa Foffa Conrad per sa defender en chaussa cartel da fabrica en Engiadina. Adam Quadroni sa defenda dentant cunter las renfatschas da Foffa Conrad.

Frank Stüssi, vicedirectur da la Weko ha ditg envers Radiotelevisiun Svizra Rumantscha che la Weko restia tar ils fatgs che ella haja communitgà la fin d'avrigl. Roland Conrad, il president dal cussegl administrativ da la gruppa Foffa Conrad aveva ditg che sia interpresa haja bain fatg cunvegnas, ma ch’els n’hajan betg auzà ils pretschs. Plinavant ha el ditg ch'i sajan stads damain che 400 cas. Vitiers vegnia che la collavuraziun cun l’interpresa Lazzarini na saja betg stada sistematica e perquai betg illegala.

Quadroni sa defenda

L’anteriur derschader federal Giusep Nay ha prendì posiziun per Adam Quadroni davart la renfatscha da Roland Conrad che Quadroni saja stà l’impressari che haja vulì auzar ils pretschs tar las cunvegnas e betg la gruppa Foffa Conrad. Nay di che quai saja ina manzegna. Quadroni n’haja betg vulì auzar ils pretschs sur quels da la concurrenza. El haja stuì auzar ils pretschs pervia ch'el saja stà il pli bunmartgà.

RR novitads 16:00